Железничка карго линија од Скопје до Солунското пристаниште

Од март следната година треба да стартуваат редовните железнички линии за товарен транспорт од Македонија кон Солунското пристаниште. Како што соопшти денеска управниот директор на пристаништето Стилиано Агелудис, ова е приоритет што македонските компании мора да го земат предвид. „Воведувањето на редовните железнички линии, што е договорено на средби со надлежните од институциите во двете држави, ќе ги намали транспортните трошоци, а тоа очекуваме да го зголеми транспортот“, истакна Агелудис на прес-конференција по презентацијата во Стопанската комора на Македонија.

Според Агелудис, водниот и железничкиот сообраќај се најевтини и со нивна комбинација може да се намалат трошоците од 20 до 30 проценти. Тој пред присутните истакна дека за осовременување на Солунското пристаниште се вложени 30 милиони евра, а ќе се инвестираат уште толку во нова опрема, машини, багери, виљушкари и друга опрема. Пристаништето работи постојано, 24 часа, а цените на услугите воопшто не се променети изминативе години и покрај економската криза. „Од овие причини сме најконкурентни од Трст до Бургас и од Драч до Пиреја“, посочи директорот.

Минатата година вкупниот транспорт преку Солунското пристаниште бил 2,163 милиони тони рефус товари или преку 23.000 контејнери што е 13,35 отсто зголемување во однос на претходниот период. Агелудис информира дека соработката со македонските компании се интензивира и дека се надминати претходно детектираните проблеми што ги предизвикаа непостојаното функционирање на царината и штрајковите во 2008 година.