Почина Галиено Фери, авторот на легендарниот Загор

Италијанската издавачка куќа „Серџо Бонели“ соопшти дека починал првиот цртач на Загор, „Духот со секира“, Галиено Фери.

Легендарниот стрип јунак, со децении беше популарен во татковината, но беше и многу читан во државите на просторот на поранешна Југославија.
Загор е стрип јунак изработен по цртежот на Фери, а по сценарио на Серџо Бонели, кој настана во 1961 година во Италија. На просторите на поранешна СФРЈ првпат се појави во 1968 година, во стрипот под наслов „Насилство во Дарквуд“. Целото име на Загор е Загор Те-неј, што на јазикот на Алгонкин Индијанците значи „Дух со секира“, што честопати се користи и како негово име во стрипот.

Вистинското име на овој стрип херој е Патрик Вајлдинг. Прво, Загор се викал Ајакс, но Бонели се предомислил кога слушнал дека постои детерџент со исто име.
Фери е заслужен за креирањето на уште еден познат лик од италијанската школа за стрип, Мистер Но, американски пилот, кој живее и работи во Бразил, а кој се појави во 1975 година.
Фери е роден во 1929 година, а во 1949 го објавил својот прв стрип кај еден мал издавач во Џенова.