Продолжува промената на фасади во Скопје

Град Скопје планира да продолжи со промена на изгледот на фасадите на неколку објекти преку Камениот мост. Распиша конкурс за избор на идејно решение за реконструкција на фасадите лоцирани околу новоизградениот плоштад „Мајка Тереза“, со исклучок на објектот на Македонска опера и балет.
Извесно е дека и овие згради ќе се бидат во стилот на зданијата од „Скопје 2014“. Старо-нови фасади се планирани за постојниот објект на музичкото училиште „Илија Николовски-Луј“ и на Факултетот за музичка уметност, палатата АСНОМ (вклучувајќи ги двете некогашни згради на „Комерцијална банка“), хотелот „Стоун бриџ“ и другите објекти што се наоѓаат помеѓу плоштадите „Мајка Тереза“ и „Филип Втори“.
На огласот се бараат идејни решенија за вкупно шест објекти. Авторите на избраните идејни решенија ќе поделат парична награда од околу 10.000 евра.