Трансформација на стар хотел во хостел кој остава без здив

Во зграда во самиот центар на Задар, на стар римски форум, каде некогаш се наоѓале, најпрвин Хотел Форум со триесетина соби, потоа управната зграда на Туристхотел, просторот е уреден и пренаменет во Boutique Hostel+Café, со капацитет од 37 соби со 111 легла.

Затекнатиот просторен лимит е трансформиран со нови гипс-картонски геометрии, различен растер на бои, керамички плочки во ритам, сјајни лакови, акрилни рефлектирачки плочи и затемнети огледала, како би се создал нов однос кон римскиот форум, во една модернистичка атмосфера.

 

Програмата постепено варира од приватно во јавно, со континуиран ходник кон собите, каде е инсталиран дворен павилјон како место за средби на гостите, па кон Café просторот, кој е сместен точно на пресекот на Cardo и Decumanus (главните улици на правоаголната мрежа на римскиот Форум).

За преуредувањето, задарската туристичко-угостителска агенција Туристхотел инвестирала 1,5 милиони евра, а проектот на хостелот го изработија проектантот Тома Плејиќ од Studio Up и дизајнерот на просторна графика Дамир Гамулин.

 

Хостелот се разликува по архитектурата и ентериерот од просечен хостел, бидејќи собите се четирикреветни и двокреветни, а секоја има своја мала бања и приклучок за Интернет. Во ходниците преовладуваат белата и задарската-модра боја, а во боксовите на хостелот и двокреветните соби доминираат портокалови тонови.

Во хостелот има неколку заеднички простории како мала трпезарија, трибина за разни активности, просторија за самопослужување, дворен простор и др. На третиот кат собите се ексклузивни по уредување и по погледите што ги нудат кон Форумот и морето. Таму може да се избере соба обложена со млечно стакло или со црни огледала кои ја пренесуваат надворешната сценографија во собата. Освен тоа, подовите се закосени а креветите подигнати, за да може од креветот да се набљудува надвор.