Објект со прекрасна глетка кон шумата

Во шумски предел во областа Централна Бохемија во Чешка, студиото Uhlik arhitekti создаваат компактен, затворен волумен изведен од дрво поцрнето со специјална техника на спалување, со кое го обложуваат надворешно  просторот со димензии 3,1 m x 5,8 m. Во влезниот дел на објектот се наоѓа рамна платформа со претпростор, и за лицето што стои на ниво на теренот овој дел е отворен со голема стаклена површина и нуди прекрасна глетка кон шумата.

Останатиот дел од објектот постепено се зголемува во косина кон друг отвор,  чија косина е добиена со потпирање на другиот крај на објектот на голем тркалезен камен кој е вкопан во теренот како темел. Тој отвор нуди прекрасни птичји перспективи низ крошните на шумските дрвја. А тука е и уникатното место за одмор. Секој скалник може да се користи како место за спиење или одмор. Под нив се наоѓаат фиоки како простор за оставање на работи, со чие повлекување се создава дупли кревет.

Овој мултифункционален простор не е создаден само како живеалиште, туку и за одредени настани, перформанси или само за медитација. Двата големи стаклени отвори можат да бидат затворени со големи капаци, поголемиот на макара а помалиот со рачка. Основната конструктивна рамка на шумскиот објект ја чинат дрвени елементи изработени од локална столарска работилница. Дрвениот материјал за панелите и конструктивните елементи е искористен од паднати дрвја на сопственичкиот посед. Внатрешноста на објектот е обложена со OBS панели од шперплоча. Покривот на објектот е изведен од двослојни асфалтни појаси. Објектот е завршен за неколку продолжени викенди од есента 2012 до пролетта 2013 година.