Оваа кула во Кина го следи патот на сонцето

Кинеското биро Open Architecture ја заврши 50 метри високата кула Sun Tower, која има конусна бетонска форма проектирана да го следи патот на сонцето, во Јантаи, североисточна Кина.

Сместена во развојната зона Yantai’s Yeda Development Zone, културното и социјално место се состои од изложбени простори, полуотворен театар, библиотека, видиковец, кафуле и бар.

Според архитектите од бирото со седиште во Пекинг, проектот на зградата во облик на конус бил заснован на џиновски сончев часовник и исто така бил замислен како современ преглед на типологиите на светилниците.

„Сончевата кула е невообичаена во однос на нејзината архитектонска типологија – истовремено е современа културна зграда, место за собирање на граѓаните, место за набљудување на океанот, џиновски сончев часовник, образовен центар за еколошка свест и светилник за урбаните души кои бараат позади хоризонтот“, изјави за Dezeen коосновачот на Open Architecture, Li Hu, велејќи: „Го спојува сето горенаведено, нов вид на видови“.

Sun Tower е изградена во консултација со инженерската фирма Arup и се состои од два слоја бетонски конусни лушпи, поврзани и зацврстени со хоризонтални плочи и рампи кои се искачуваат низ зградата.

Надворешноста на зградата е пробиена со бројни кружни прозорци кои се проектирани да ја насочат светлината и да ја подобрат вентилацијата без да ја зголемуваат потрошувачката на енергија.

Страната на зградата свртена кон морето се чини дека е отворена, создавајќи непречен поглед на морето од театарот на приземје и видиковецот на врвот.

Посетителите можат да пристапат до театарот преку тунел за премин што се пробива низ зградата. Театарот ја зафаќа конкавната внатрешна обвивка, за која бирото вели дека природно го засилува звукот апсорбиран од океанот.

Изложбените простори се распоредени покрај пешачките рампи и опремени се со дигитални екрани и проекции.

Phenomena Space, библиотека и полуотворена платформа за набљудување, се наоѓа на врвот на зградата. Овде, кружниот отвор на кровот овозможува дождовницата да паѓа во базенот под него, создавајќи единствена водена инсталација.

Open Architecture ја проектирале формата на Sun Tower следејќи ја променливата патека на сонцето во текот на годината, во знак на историската врска на регионот со обожавањето на сонцето.

Северниот раб на зградата е паралелен со пладневната сончева светлина на рамнодениците, додека влезниот тунел се усогласува со зајдисонцето на зимската краткоденица.

Централната оска на театарот е позиционирана така да се усогласи со изгрејсонцето над блискиот остров Жифу  во тек на летната краткоденица.

Театарот, исто така, се протега до отворен плоштад, кој ја опкружува зградата и е покриен со серија елиптични обрасци на прстени.

Линеарен канал за вода го пресекува плоштадот и раскрсниците помеѓу обрасците на прстените и каналот за вода и се проектирани да одговараат на сенката на зградата во одредени часови во деновите на рамноденицата.

Open Architecture сакале проектот да помогне повторно да ги поврзе луѓето со природата.

„Поради огромниот ентузијазам на јавноста и огромниот број посетители на зградата од нејзиното отворање, се чувствувавме длабоко благодарни и сигурни во она што имавме намера да го направиме  – создавање архитектура која може да помогне да се поврзат луѓето со природата и времето на длабоки начини“, рече коосновачот на Open Architecture, Huang Wenjing и додава: „Природата е света, тоа е нашето уверување. За да се бориме против климатската криза, треба да го промениме начинот на кој го гледаме и разбираме светот“.