За прв пат во историјата, глобалниот воден циклус се наоѓа надвор од рамнотежа

Човештвото го исфрли од рамнотежа глобалниот воден циклус, по прв пат во историјата, поттикнувајќи на тој начин растечка водна катастрофа која може да ја уништи економијата, производството на храна и животите, се вели во значајниот нов извештај, подготвен од страна на Johan Rockström, копретседавач на Глобалната комисија за економија на водите, и група меѓународни стручњаци.

Децениите со деструктивно користење на земјиштето и лошото управување со водите сега се судираат и со климатската криза, што заедно претставува сериозен стрес за глобалниот воден циклус, се вели во извештајот. Природниот циклус на водите подразбира нејзино испарување од тлото, подигање во атмосферата, кондензирање на водената пареа и повторно враќање на тлото преку врнежите. Но, пореметувањата во овој циклус носат бројни проблеми. Речиси 3 милијарди луѓе се соочува со недостиг на вода. Посевите се сушат, а градовите тонат додека подземната вода под нив се суши.

Последиците ќе бидат уште покатастрофални без итна акција. Кризата со водите се заканува на повеќе од 50% од глобалното производство на храна, како и на намалување на БДП во просек за 8% до 2050 година. Загубите во земјите со ниски приходи ќе бидат уште поизразени. Извештајот прави разлика помеѓу „сина“ вода, односно водата од езерата, реките и аквиферите, наспроти „зелената“ вода складирана во тлото и растенијата. Иако снабдувањето со „зелена“ вода долго било занемарувано, тоа е еднакво важно за водниот циклус, стои во извештајот. Нарушувањата во водниот циклус се „длабоко испреплетени“ со климатските промени, покажал извештајот.

Авторите на извештајот велат дека светските влади мора да го препознаат водниот циклус како „општо добро“ и колективно да се позанимаваат со ова прашање. Земјите зависат една од друга, не замо поради реките и езерата кои премостуваат државни граници, туку и поради водата во атмосферата која може да мине големи растојанија. Тоа значи дека одлуките донесени во една земја, сериозно може да влијаат врз случувањата во друга земја. Извештајот повикува на воведување ценовни политики кои ќе го спречат нерационалното трошење на водата, како и избегнување на посеви и градење објекти кои се особено „жедни“ за вода во региони со недостаток на вода.