Какви казни се предвидени во европските земји за оние кои ја враќаат километражата на половните автомобили

Во неколку земји во Европа, измамата со километражата на возилата е казнива со многу високи парични казни, а во некои дури се предвидени и затворски казни. Новата студија на CarVertical, ги открива овие состојби, но и загубите кои купувачите и државите ги претрпуваат поради оваа појава. Истражувањето е спроведено во 21 земја во Европа. Студијата покажува дека во овие земји законодавството вклучува казнување на сите видови измами со автомобилите, вклучувајќи го и враќањето на километражата. Но, од различни причини прекршителите најчесто ги избегнуваат острите казни. Иако казните варираат од земја до земја, сепак постојат земји во кои ова е сфатено исклучително сериозно. На пример во Франција казната изнесува 300.000 евра. Во Хрватска на пример, предвидена е затворска казна до осум години, а во Полска до пет години. Во Чешка и Литванија предвидена е затворска казна до две години, во Шпанија и Италија до 3,5 години, додека Германија и Унгарија предвидуваат максимална казна од една година затвор.