Седиште на фармацевтска компанија во Загреб

Седиштето на фармацевтската компанија „Салвео“ се наоѓа во новосоздадената деловна зона на Завртница во Загреб. Со проектот за адаптација предвидено е  проширување и реновирање на постоечкиот деловен простор и реорганизација на распоредот во согласност со динамиката и флексибилноста на новите трендови во работењето.

Архитектите Роберт и Мартина Крижњак современата типологија на деловните простории ја реализирале преку нагласување на заедничките и социјалните простори и можноста за индивидуализирана персонализација на канцелариите.

Покрај новите канцелариски единици, уредени се и предавална, сала за состаноци, работно-креативен „hub“ со трибина и кујна, додека посебна карактеристика е коридор со прецизно дизајниран ѕид кој обединува ниши за краткотрајна работа.

Оската на ходникот и главната комуникација од едната страна се опкружени со канцелариски единици чие повторување на полни и празни површини материјализира постојана игра на светлина и сенка. Од другата страна на коридорот, правилната низа на вертикални елементи е збогатена со утилитарни повеќенаменски рамки, кои го прават ѕидот тродимензионален, не само просторно, туку и функционално.

Посебно внимание е посветено на изборот на материјали, текстури и бои, чија примена ја отсликува двојноста на просторот, кој истовремено врши функција на професионално претставување на успешна компанија и пријатна работна атмосфера. Со користење на јасна поделба на полните површини на црни и бели се создава чист визуелен јазик што формира подлога за природни дрвени површини погодни за крајниот корисник.