Албанија станува регионален енергетски центар?

„Во време кога Европа се обидува да спроведе диверзификација на своите извори на снабдување со гас, со цел намалување на зависноста од Русија, Албанија би можела да се профилира во клучен играч и енергетски јазол во европскиот гасен сектор“,  се вели во анализата на грчкиот портал Euroactiv. Тоа ќе се реализира со помош од САД. Според изворниот текст, американската компанија Excelerate Energy Inc. ја гледа Албанија како земја која може да го снабдува регионот со гас и други енергенти, во периодот што следува по акутната енергетска криза. Оваа компанија ќе обезбеди пловечки соларни електрани во Албанија, а ќе соработува и со Exxon Mobil на проекти за користење на Течниот природен гас (ТПГ) во Валона.  Низ Албанија минува Трансјадранскиот гасовод (TAP), кој обезбедува Азербејџански гас.

Во период кога Албанија планира да гради повеќе хидроцентрали на северот и гасни проекти на југот, можно е да се користат интерконекциите во регионот – електроенергетската врска Албанија – Македонија од 400 kV, која веќе е во изградба, како и новиот далековод со Косово, што на земјата ќе и даде огромни можности на регионалните енергетски пазари.