Општина Центар објави конкурс за идејно решение на локацијата кај „Треска“

Општина Центар го објави Конкурсот за изработка на идејно архитектонско-урбанистичко решение за локалитетот Треска.

Програмската задача што е креирана од страна на стручната Комисија ангажирана за изготвување на задачата, има цел да обезбеди комбинирани содржини, односно станбен и деловен фонд во рамнотежа со јавниот простор, како и нови содржини за изградба на нова детска градинка, придружни комерцијални и јавни содржини во функција на домувањето, содржини од областа на културата, зачувување на просторните маркери од локалитетот, зеленило со еколошка функција и одржливост во планирањето на сообраќајот.

Градоначалникот Саша Богдановиќ ја повикува стручната јавност, правните и физичките лица да конкурираат со проекти што ќе овозможат нова станбена заедница и јавен простор со квалитетни урбанистички стандарди, следејќи ги принципите на просторна одржливост за квалитетен економски, социјален и еколошки развој.

Заинтересираните кандидати може да аплицираат во периодот од 24 јуни до 1 септември оваа година. Право на учество на конкурсот ќе имаат домашни и странски физички и правни лица, со услов едно лице да има валидно овластување од областа на урбанистичкото планирање.

Веќе од денес, целосната документација ќе биде достапна на Електронскиот систем за јавни набавки и на официјалната веб-страница на Општината Центар.