Белорусија добива најевтин руски гас

Скоро 20 земји на стариот континент зависат од рускиот гас. Иако гасот стигнува од истиот извор, цените на испорака се разликуваат од земја до земја. Ценовниците се „деловна тајна“, и зависат од начинот и количините на испорака, но во добар дел и од пријателските врски. Така, скоро сите бивши членки на Советскиот Сојуз имаат одредени привилегии.

Во моментов најповластена е Белорусија, која за илјада кубни метри плаќа 140 долари. До скоро голем попуст имаше и Украина, која имаше цена од 270 долари. Но, по прекинот на „пријателството“ меѓу Москва и Киев, цената порасна на 420 долари. Ако го анализираме нашиот регион, познато е дека цената за Србија е 370 долари, а за Бугарија цената не е достапна за јавноста. Цената за Македонија е околу 500 долари, и е една од највисоките во Европа.