Рајска куќа со природна оаза во срцето

Наменета за семејство од неколку генерации, оваа голема куќа во Сингапур крие вистинска оаза во нејзиниот центар: водни површини, водопади и степенести градини кои се спуштаат од покривот до срцето на домот.

Куќата Cornwall Gardens е дело на студиото Chang Architects со седиште во Сингапур, кое доби бројни архитектонски награди за овој проект.

Семејната куќа е дизајнирана така што може да прифаќа идни членови ако децата ги прошират своите семејства и сакаат да останат во рајската куќа.

Шест спални соби, теретана, библиотека, како и заеднички дневни соби кои вклучуваат неколку трпезарии, се распоредени околу централниот двор со базен, водопад и езерото кое е на ниво на подрумот.

Бујното зеленило може да се види насекаде во куќата – и во внатрешноста и на терасата на покривот, меѓу спратовите, околу водните површини.

“Семејството и природата го делат истиот простор. Растенијата, водата и просторот за живеење се спојуваат во една целина“, објаснуваат архитектите.

Изградена на закосен терен, куќата е адаптација на постојната зграда лоцирана на копно. Новата куќа ја има зафатено скоро целата парцела, а нејзиниот дизајн предвидува сите простории да бидат отворени кон внатрешниот двор.

Таквиот план има обезбедено многу природна светлина, природна вентилација и пасивно ладење и создаде еколошка средина што промовира здрав живот за сите.