Tiny Offices за оние кои имаат привилегија да работат од дома

За жал работењето од дома стана дел од нашите животи, секако само во оние професии кои во ситуацијава ја имаат таа „среќа“ и привилегија да не одат на работа, а обврските да ги извршуваат од дома. Состојбата со пандемијата трае долго, веќе влегуваме во последниот квартал на 2020. година и се уште е тешко луѓето да најдат доволно простор и мир во своите домови за да можат ефикасно да работат. На луѓето им е неопходна посебна зона за да можат да бидат продуктивни.

Имајќи го ова на ум и големата промена во начинот на животот, холандското дизајнерско биро Dutch Invertuals создале серија канцелариски кабини направени од ребраст алуминиум и дрво за холандскиот парк за одмор и престој Droomparken.

Наречени Tiny Offices, овој компактен работен простор создаден е на начин да поттикне слобода, креативност и перформанси. Кабините се со површина од околу шест квадратни метри, а алуминиумската конструкција има контрастна дрвена врата и големи прозорци. „Најголемата инспирација потекна од кабини кои се потполно вградени во природно опкружување“, велат архитектите од Invertuals, Chris Collaris и деректорката на дизајн Wendy Plomp.

Сите кабини имаат ентериер дизајниран по мерка во различни бои и нагласени се различните материјали – филц и акрилик, кои се избрани поради нивната функционалност. „Бидејќи просторот е мал и интимен, сите материјали треба да имаат смисла. Затоа, користевме акрилен ѕид што го прави просторот да изгледа попростран, но исто така можете и да пишувате на него“, вели Collaris. За да не се чувствувате клаустофобично во малиот простор, дизајнот овозможува многу светлина и создава отвореност преку деталите.

Проектот беше забрзан поради пандемијата, бидејќи веќе не се поставува прашање за нормална канцеларија, промената ширум светот се случи преку ноќ и луѓето почнаа да бараат решенија кои нема да влијаат на нивната продуктивност и ќе им помогнат да работат под притисок на криза.