Почина Еузебио Леал Спенглер, Кубанецот кој ја обнови Хавана

Еузебио Леал Спенглер, кој се борел за зачувување на старата Хавана, претворајќи ја во историска област, во архитектонски скапоцен камен и туристичка дестинација од прва класа, почина на 31. јули во Хавана. Имал 77 години, јавува Гранма, официјалниот весник на кубанската комунистичка партија. Во последниве години, тој се лечел од рак на панкреасот.

Мигел Дијас-Канел, претседателот на Куба во својата изјава по повод смртта на Леал го нарече „Кубанецот кој ја спаси Хавана“

Леал, кубански историчар, ги започнал напорите за зачувување на кубанската престолнина во осумдесеттите години на минатиот век, кога стариот центар на главниот град бил во руинирана состојба. Жителите живееле без вода и честопати без електрична енергија, а ѓубрето се трупало на улиците, додека 250-годишните згради понекогаш се рушеле пред нивните очи.

Како историчар и директор на Музејот на град Хавана, Леал бил страствен во однос на прашањето за зачувување на архитектонската историја на Куба. Тој еднаш легнал пред валјак за да спаси колонијална улица од асфалтирање. Благодарение на неговите упорни и несебични напори, Старата Хавана во 1982. година е прогласена за светско наследство на УНЕСКО.

Но, недостатокот на финансиски средства ги кочел амбициозните планови на Леал за обнова, сè до раните 90-ти, кога се распадна Советскиот Сојуз, а Куба изгуби милиони субвенции. Во економската криза, кубанскиот лидер Фидел Кастро, со кого Леал се спријателил, му дал огромна моќ да собира даноци и профит од туризмот во стариот центар.

Преку државната компанија Habaguanex, Леал вложувал пари во градежни проекти. Тој ги обновил елегантните плоштади од 18. век, барокните катедрали, рестораните и хотелите, вклучувајќи го и познатиот розов хотел Ambos Mundos, каде Ернест Хемингвеј ја напиша „За кого бијат камбаните“. Парадоксално, Старата Хавана стана капиталистичка приказна за успех: реновираните згради привлекле странски туристи, чии пари потоа се користени за финансирање на реставрацијата.

До средината на 2000-тите, околу 300 згради – околу една третина од зградите во Старата Хавана – беа реновирани. А Леал, кој вработувал 3.000 работници како шеф на Канцеларијата за историја, бил познат како херој и узор на конзервативците ширум светот.

„Беше единствена фигура за своето време“, изјавил во едно интервју Jeffrey DeLaurentis, американски дипломат, кој служел на Куба за време на администрацијата на Обама. „Исто така му беше дадена неверојатна автономија. Тоа беше мошне ново за Куба“.

Како што Старата Хавана станала економски мотор на Куба, Леал бил познат како неофицијален градоначалник на престолнината. Тој ги поздравувал добронамерните луѓе на улиците (обично во неговата препознатливаа сива кошула). Тој глумел во ТВ серија за историјата на главниот град, „Andar La Habana“ („Прошетај ја Хавана“). Предавал на американските универзитети, а новинарите го барале за изјави како водечки интелектуалец.