Свечено доделена наградата „Андреја Дамјанов“ на архитектката Билјана Филиповска

Во присуство на голем број гости, архитекти од сите генерации, претставници од јавниот живот, синоќа во Музејот на современа уметност (МСУ) во Скопје беше доделена наградата за животно дело „Андреја Дамјанов“ на архитектката Билјана Филиповска.

Архитектот Билјана Филиповска е добитник на наградата за животно дело, особени достигнувања и личен придонес во развојот на архитектурата и градителството за 2017 година „Андреја Дамјанов“.

Наградата ја доделува Асоцијацијата на архитекти на Македонија.

Одлуката за наградата ја донесе петчлената комисија во состав: Радован Раѓеновиќ, д.и.а.(претседател), д-р проф.Михаил Токарев д.и.а., д-р проф.Елизабета Касапова, д.и.а., Мишо Арсов, д.и.а. и Иван Арсовски, д.и.а.

На свеченоста на доделувањето на наградата „Андреја Дамјанов“ говореа и Мартин Пановски, претседател на ААМ, стопанственикот Трифун Костовски почесниот член на Асоцијацијата на архитекти, архитектот Радован Раѓеновиќ, претседател на комисијата за доделување на награда и минатогодишниот добитник на наградата и в.д. директорката на Музејот на современа уметност, Мира Гаќина.

На крајот архитектката Филиповска заблагодарувајќи се на наградата, рече дека е среќна што доаѓа од колегите. Во својот говор, Филиповска се наврати на нејзините најзначајни проекти во својата 40-годишна кариера, почнувајќи од првиот анганжман како дел од група на млади архитекти кои го решавале комплексот Езеро Треска, потоа за решенијата за поштите во Неготино и во Штип, кои ги работела со архитектката Ружа Јовановиќ, за искуството во изградбата на станбените објекти како зградите во Капиштец, и секако за нејзиното учество на објектот Олимписки базен во Скопје.

Филиповска го истакна како значаен сегмент во нејзиното творештво и искуството што го стекнала на градилишта во Ирак.

Архитектката Филиповска им се заблагодари на ААМ и на сите колеги со кои работела во „Пелагонија“, „Македонија проект“, а потоа во „Студио 2000“.

Својот најзначаен проектантски професионален раст го реализира во „Пелагонија проект“, каде непрекинато работи од 1977 до 2002 година. Своето архитектонско студио „СТУДИО 2000“ го основа во 2000 година, во кое е активна до денешен ден.

Архитектката Билјана Филиповска работела на неколку проекти што оставиле траен белег во македонската архитектура, вклучувајќи ги Олимпискиот базен во Скопје, Комплексот Езеро Треска, станбените кули во населбата Капиштец и други зданија. Добитничка е на Ноемвриската награда на град Скопје во 1979 година, Борбината награда за архитектура на РМ во 1979 година и на други признанија за нејзината професионална дејност.

Инаку младите присутни архитекти на свеченото доделување ги охрабри колку што е можно повеќе да учествуваат на архитектонски и урбанистички конкурси, бидејќи според неа, „конкурсите кои даваат слобода“ и архитектите тука се вистинските креатори…